Monday, January 9, 2012

يسقط يسقط حسني مبارك - March 30, 2011


يسقط يسقط حسني مبارك.. الله، هو إنتي ما دريتيش.. لأ مش واخدة بالي.. الله، ما هو مشي من شهرين.. مشي مشي؟.. لأ هو مش مشي مشي بس زي ما يكون مشي.. طب والفلافل بتاعته مشيوا؟.. لأ الفلول لسة شوية.. طب وسلطاته وبابا غنوجه؟.. لأ دول كمان لسة شويتين.. الله يبقى ما مشيش بقى.. لأ هو في حكم إنه مشي.. طب وفلوسنا رجعت؟.. لأ هارد لاك أصلكم إتأخرتم في تقديم الطلب والمستندات.. صمت رهيب ثم.. يسقط يسقط حسني مبارك بفلوله وفلافله وسلطاته وبابا غنوجه

رئيس هيئة قضايا الدولة: نستطيع استرداد الأموال المنهوبة حتي لو بعد 100 عام http://fb.me/JWpTt1

على الريق بقى من غير مقدمات: يسقط يسقط حسني مبارك بنظامه برجالته ببقاياه بفساده بكل مساوئه.. إحنا قرفنا ياجماعة مش معقول كدة! حد يصدق إننا داخلين على شهرين وهو لسة في وسطنا بيشتي في شرم ولا هو هنا، واحنا معكوكين في المطر لحد الركب عشان حكوماته الفاسدة عمرهم ما كلفوا نفسهم يعملوا صرف مياه أمطار عدل؟ وكمان إيه؟ رفض يستلم ورق استدعاءه للمسائلة! هو فيه إيه

بعد موشح حسني الأساسي فيه كذا خبر: الخبر الأول تحية لوزارة الخارجية وسفارتنا في سوربا اللي اشتغلوا بإخلاص حتى تم إطلاق المهندسين المعتقلين (التهمة=مصري حر). أخيرا وزارة الخارجية والسفارات عرفوا إن المصري له ثمن ومش بس محفظة لإرسال التحويلات! ومش حننسى السفارات اللي كانت بتغلق أبوابها في وجه المصريين البسطاء ومحدش جاب حقوق المصريين اللي رجعوا في توابيت من العراق مثلا.. ماعلينا، آدي ميزة للثورة أهي عشان محدش يزعل


الخبر الثاني: إني بقي لي يومين ما شفتش اسم أسامة سرايا ولا حتى في الصفحة الأخيرة اللي كان عاوز يأخذ فيها عامود.. والله ونظفتي يا أهرام وعقبال التي في :))) والخبر الثالث البرادعي يقول: لو طلبوا مني إن أكون في المجلس الرئاسي على ألا أترشح لانتخابات الياسة سأقبل فورا.. مرة أخرى مبرهنا انه لا يهمه المنصب ولكن يهمه إصلاح مصر

ما الخبر الرابع "اللوز": طالب الشيخ السلفي محمود عامر المجلس الأعلى للقوات المسلحة بترشيح شخصية عسكرية قوية لانتخابات الرئاسة.. وفي حالة الرفض فإنه سيرشح نفسه.. الجدير بالذكر إن الشيخ عامر كان قد سبق له تكفير البرادعي والقرضاوي بحجة أنهما شجعا الشعب على المظاهرات.. عيشوا حياتكم مع الأخبار دي ونعود بعد الفاصل :)

No comments:

Post a Comment